Temps de lecture
1
min
poésie 72LECTURES

Je vous laisse mon cuer en gage

Doulce, dame, a Dieu vous command,
Aler m'en fault, dont il me poise,
Cent fois a vous me recommand,
Et vous suppli, doulce et courtoise,
Ne m'oubliez ou que je voise ;
Et pour retour de ce voiage,
Je vous laisse mon cuer en gage.

- Amis, vostre departement
Petitement mon cuer renvoise,
Et se m'oubliez nullement,
Il ne sera nul qui racoise
Mon dolent plour. A basse noise
Vous di a Dieu, et pour partage,
Je vous laisse mon cuer en gage.

- Belle, sachiez certainement
Que, pour dame ne pour bourgoise,
Ne vous oublieray vraiement ;
D'autre amour ne donne une boise,
Tost revendray comment qu'il voise,
Et de vous renvoier message,
Je vous laisse mon cuer en gage.