1:47
Du lac Leman les sermons fascheront,
Les jours seront reduicts par les sepmaines,
Puis mois, puis an, puis tous déffailliront,
Les Magistrats damneront leurs loix vaines.

1:48
Vingt ans du règne de la Lune passés,
Sept mil ans autre tiendra sa monarchie
Quand le soleil prendra ses jours lassés
Lors accomplir & mine ma prophétie.

1:49
Beaucoup beaucoup avant telles menées,
Ceux d'Orient par la vertu lunaire
L'an mil sept cens feront grands emmenées,
Subjugant presque le coing Aquilonaire.

1:50
De l'aquatique triplicité naistra,
D'un qui fera le jeudy pour sa feste :
Son bruit, loz, regne, sa puissance croistra,
Par terre & mer aux Oriens tempeste.

1:51
Chef d'Aries, Jupiter & Saturne,
Dieu éternel quelles mutations !
Puis par long siecle son maling temps retourne
Gaule et Italie, quelles esmotions ?

1:52
Les deux malins de Scorpion conjoints,
Le grand Seigneur meurtri dedans sa salle :
Peste à l'Eglise par le nouveau roy joinct,
L'Europe basse & Septentrionale.

1:53
Las qu'on verra grand peuple tourmenté,
Et la loy saincte en totale ruine,
Par autres loix toute la Chrestienté,
Quand d'or d'argent trouve nouvelle mine.

1:54
Deux revolts faicte du maling falcigere,
De regne et siecles faict permutation
Le mobil signe à son endroit s'ingère,
Aux deux esgaux et d'inclination.

1:55
Soubs l'opposite climat Babylonique,
Grand sera de sang effusion,
Que terre et mer, air, ciel sera inique,
Sectes, faim, regnes pestes, confusion.

1:56
Vous verrez tost & tard taire grand change,
Horreurs extremes & vindications,
Que si la lune conduite par son ange,
Le ciel s'approche des inclinations.