10:37
L'assemblee grande pres du lac de Borget,
Se ralieront pres de Montmelian,
Marchans plus oultre pensifz feront proget
Chambry, Moraine combat sainct Julian.

10:38
Amour alegre non loing pose le siege,
Au sainct barbar seront les garnisons:
Ursins Hadrie pour Galois feront plaige,
Pour peur rendus de l'armee du Grisons.

10:39
Premier fils veufve malheureux marriage,
Sans nuls enfans deux isles en discord,
Avant dixhuict incompetant eage,
De l'autre pres plus bas sera l'accord.

10:40
Le jeune nay au regne Britannique,
Qu'aura le pere mourant recommandé,
Iceluy mort LONOLE donra topique,
Et a son fils le regne demandé.

10:41
En la frontiere de Caussade et Charlus,
Non guieres loing du fonds de la vallee:
De ville franche musicque a son de luths,
Environnez combouls et grand mytee.

10:42
Le regne humain d'Anglique geniture,
Fera son regne paix union tenir,
Captive guerre demy de sa closture,
Long temps la paix leur fera maintenir.

10:43
Le trop bon temps trop de bonté royale,
Fais et deffois prompt subit negligence.
Legier croira faux despouse loyalle,
Luy mis a mort par benevolence.

10:44
Par lors qu'un Roy sera contre les siens,
Natifs de Blois subjugera Ligures,
Mammel, Cordube et les Dalmatiens,
Des sept puis l'ombre a Roy estrennes et lemurs.

10:45
L'ombre du regne de Navarre non vray,
Fera la vie de fort illegitime:
La veu promis incertain de Cambray,
Roy Orleans donra mur legitime.

10:46
Vie sort mort de l'OR vilaine indigne,
Sera de Saxe non nouveau electeur:
De Brunsuic mandra d'amour signe,
Faux le rendant aux peuple seducteur.