10:21
Par le despit du Roy soustenant moindre,
Sera meurdry luy presentant les bagues:
Le pere au filz voulant noblesse poindre,
Fait comme a Perse jadis feirent les Mague:

10:22
Pour ne vouloir consentir a divorce,
Qui puis apres sera cogneu indigne:
Le Roy des Isles sera chassé par force,
Mais a son lieu que de roy n'aura signe.

10:23
Au peuple ingrat faictes les remonstrances,
Par lors l'armee se saisira d'Antibe,
Dans l'arc Monech feront les doleances,
Et a Frejus l'un l'autre prendra ribe.

10:24
Le captif prince aux Italles vaincu
Passera Gennes par mer jusqu'a Marseille,
Par grand effort des forens survaincu
Sauf coup de feu barril liqueur d'abeille.

10:25
Par Nebro ouvrir de Brisanne passage,
Bien eslongez el tago fara muestra,
Dans Pelligauxe sera commis l'outrage,
De la grand dame assise sur l'orchestra.

10:26
Le successeur vengera son beau frere,
Occuper regne souz umbre de vengeance,
Occis ostacle son sang mort vitupere,
Long temps Bretaigne tiendra avec la France.