8:15
Vers Aquilon grands efforts par homasse
Presque l'Europe et l'univers vexer,
Les deux eclipse mettra en tel chasse,
Et aux Pannons vie et mort renforcer.

8:16
Au lieu que HIERON fait sa nef fabriquer,
Si grand deluge sera et si subite,
Qu'on n'aura lieu ne terre s'ataquer,
L'onde monter Fesulan Olympique.

8:17
Les biens aisez subit seront desmis,
Par les trois freres le monde mis en trouble.
Cité marine saisiront ennemis,
Fain, feu, sang, peste, et de tous maux le double.

8:18
De Flora issue de sa mort sera cause,
Vn temps deuant par jeune et vieille bueyra,
Par les trois lys luy feront telle pause,
Par son fruit sauve comme chair crue mueyre.

8:19
A soubstenir la grande cappe troublee,
Pour l'esclaircir les rouges marcheront:
De mort famille sera presque accablee,
Les rouges rouges le rouge assomeront.

8:20
Le faux messaige par election fainte,
Courir par urban rompue pache arreste:
Voix acheptees, de sang chappelle tainte,
Et a un autre l'empire contraicte.