7:27
Au cainct de Vast la grand cavalerie,
Proche a Ferrage empeschee au bagaige:
Pompt a Turin feront tel volerie,
Que dans le fort raviront leur hostaige.

7:28
Le capitaine conduira grande proye,
Sur la montaigne des ennemis plus proche:
Environné, par feu fera tel voye,
Tous eschappez or trente mis en broche.

7:29
Le grand Duc l'Albe se viendra rebeller,
A ses grans peres fera le tradiment:
Le grand de Guise le viendra debeller,
Captif mené et dressé monuement.

7:30
Le sac s'approche, feu, grand sang espandu
Po, grand fleuves aux bouviers l'entreprinse,
De Gennes, Nice apres long attendu,
Foussan, Turin, a Sauillon la prinse.

7:31
De Languedoc et Guienne plus de dix
Mille voudront les Alpes repasser:
Grans Allobroges marcher contre Brundis
Aquin et Bresse les viendront recasser.

7:32
Du mont Royal naistra d'une casane,
Qui cave, et compte viendra tyranniser:
Dresser copie de la marche Millane,
Favene, Florence d'or et gens espuiser.

7:33
Par fraude regne forces expolier,
La classe, obsesse, passages a l'espie:
Deux fainctz amis se viendront rallier,
Esveiller hayne de long temps assoupie.

7:34
En grand regret sera la gent Gauloise,
Coeur vain, legier croirera temerité:
Pain, sel, ne vin, eaue: venin ne cervoise,
Plus grand captif, faim, froit, necessité.

7:35
La grande pesche viendra plaindre, plorer,
D'avoir esleu, trompés seront en l'aage
Guiere avec eux ne voudra demourer,
Deceu sera par ceux de son langage.

7:36
Dieu, le ciel tout le divin verbe a l'unde,
Porté par rouges sept razes a Bisance:
Contre les oingz trois cens de Trebisconde,
Deux loix mettront et horreur, puis credence.