7:15
Devant cité de l'Insubre contree,
Sept ans sera le siege devant mis:
Le tres grand Roy y fera son entree,
Cité puis libre hors de ses ennemis.

7:16
Entree profonde par la grand Royne faicte
Rendra le lieu puissant inaccessible:
L'armee des trois lyons sera deffaite,
Faisant dedans cas hideux et terrible.

7:17
Le Prince rare de pitié et clemence,
Viendra changer par mort grand cognoissance:
Par grand repos le regne travaillié,
Lors que le grand tost sera estrillé.

7:18
Les assiegés couloureront leur paches,
Sept jours apres feront cruelle issue,
Dans repoulssés, feu, sang. Sept mis a l'hache
Dame captive qu'avoit la paix tissue.

7:19
Le fort Nicene ne sera combatu,
Vaincu sera par rutilant metal.
Son faict sera un long temps debatu,
Aux citadins estrange espouvantal.

7:20
Ambassadeurs de la Toscane langue,
Avril et May Alpes et mer passer:
Celuy de veau exposera l'harangue,
Vie Gauloise ne venant effacer.