9:86
Du bourg Lareyne ne parviendront droit a Chartres,
Et feront pres du pont Anthoni panse,
Sept pour la paix cantelleux comme martres.
Feront entree d'armee a Paris clause.

9:87
Par la forest du Touphon essartee,
Par hermitage sera posé le temple,
Le Duc d'Estampes par sa ruse inventee.
Du mont Lehori prelat donra exemple.

9:88
Calais Arras, secours a Theroanne,
Paix et semblant simulera l'escoutte,
Soulde d'Alabrox descendre par Roane
Destornay peuple qui deffera la routte.

9:89
Sept ans sera Philip fortune prospere.
Rabaissera des Arabes l'effaict,
Puis son midy perplex rebours affaire,
Jeune ognion abismera son fort.

9:90
Un capitaine de la grand Germanie
Se viendra rendre par simulé secours
Un roy des roys aide de Pannonie,
Que sa revolte fera de sang grand cours.

9:91
L'horrible peste Perynte et Nicopolle,
Le Chersonnez tiendra et Marceloyne,
La Thessalie vastera l'Amphipolle,
Mal incogneu et le refus d'Anthoine.

9:92
Le roy vouldra en cité neuf entrer,
Par ennemis expugner l'on viendra
Captif libere faulx dire et perpetrer,
Roy dehors estre, loin d'ennemis tiendra.

9:93
Les ennemis du fort bien eslongnez,
Par chariots conduict le bastion,
Par sur les murs de Bourges esgrongnez,
Quand Hercules battra l'Haemathion.

9:94
Foibles galeres seront unies ensemble,
Ennemis faux le plus fort en rampart:
Faible assaillies Vratislaue tremble,
Lubecq et Mysne tiendront barbare part.

9:95
Le nouveau faict conduira l'exercite,
Proche apamé jusques au pres de rivage:
Tendant secours de Millannoile eslite,
Duc yeux privé a Milan fer de cage.