4:60
Les sept enfans en hostaige laissez,
Le tiers viendra son enfant trucider:
Deux par son filz seront d'estoc percés.
Gennes, Florence, los viendra encunder.

4:61
Le vieux mocqué et privé de sa place,
Par l'estrangier qui le subornera:
Mains de son filz mangees devant sa face,
Le frere a Chartres, Orl. Rouen trahira.

4:62
Un coronel machine ambition,
Se saisira de la plus grand armee,
Contre son Prince fainte invention,
Et descouvert sera soubz sa ramee.

4:63
L'armee Celtique contre les montaignars,
Qui seront sceus et prins a la lipee:
Paysans frais pousseront tost faugnars,
Precipitez tous au fil de l'espee.

4:64
Le deffaillant en habit de bourgeois,
Viendra le Roi tempter de son offense:
Quinze souldartz la pluspart Ustagois,
Vie derniere et chef de sa chevance.

4:65
Au deserteur de la grande forteresse,
Apres qu'aura son lieu abandonné,
Son adversaire fera grand prouesse,
L'empereur tost mort sera condamné.