4:54
Du nom qui onques ne fut au Roy Gaulois
Jamais ne fut un fouldre si craintif.
Tremblant l'Italie, l'Espaigne et les Anglois,
De femme estrangiers grandement attentif.

4:55
Quand la corneille sur tout de brique joincte,
Durant sept heures ne fera que crier:
Mort presagee de sang statue taincte,
Tyran meutri, aux Dieux peuple prier.

4:56
Apres victoire de babieuse langue,
L'esprit tempte en tranquil et repos:
Victeur sanguin par conflict faict harangue,
Roustir la langue et la chair et les os.

4:57
Ignare envie au grand Roy supportee,
Tiendras propos deffendre les escripitz.
Sa femme non femme par un autre tentee,
Plus double deux ne fort ne criz.

4:58
Soleil ardent dans le gosier coller,
De sang humain arrouser terre Etrusque:
Chef seille d'eau, mener son fils filer,
Captive dame conduicte en terre Turque.

4:59
Deux assiegez en ardente ferveur:
De soif estaincts pour deux plaines tasses
Le fort limé, et un vieillart resveur,
Aux Genevois de Nira monstra trasse.