3:37
Avant l'assaut l'oraison prononcee,
Milan prins d'Aigle par embusches decevez:
Muraille antique par canons enfoncee,
Par feu et sang a mercy peu receus.

3:38
La gent Gauloise et nation estrange,
Outre les monts, morts, prins et profligez:
Au moins contraire et proche de vendage,
Par les Seigneurs en accord redigez.

3:39
Les sept en trois mois en concorde,
Pour subjuguer des Alpes Appenines:
Mais la tempeste et Ligure couarde,
Les profligent en subites ruines.

3:40
Le grand theatre se viendra redresser,
Les des jettez et les rets ja tendus:
Trop le premier en glaz viendra lasser,
Pars ares prostrais de long temps ja fendus.

3:41
Bossu sera esleu par le conseil.
Plus hideux monstre en terre n'apperceu,
Le coup voulant crevera l'oeil,
Le traistre au Roy pour fidelle receu.

3:42
L'enfant naistra a deux dents en la gorge,
Pierres en Tuscie par pluy tomberont:
Peu d'ans apres ne sera bled ni orge,
Pour saouler ceux qui de faim failliront.

3:43
Gens d'alentour de Tarn Loth, et Garonne
Gardez les monts Apennines passer:
Vostre tombeau pres de Rome et d'Anconne,
Le noir poil crespe fera trophee dresser.

3:44
Quand l'animal a l'homme domestique,
Apres grands peines et sauts viendra parler,
Le fouldre a vierge sera si malefique,
De terre prinse et suspendue en l'air.

3:45
Les cinq estranges entrez dedans le temple
Leur sang viendra la terre prophaner:
Aux Tholousains sera bien dur example,
D'un qui viendra les lois exterminer.

3:46
Le ciel (de Plancus la cité) nous presage,
Par clers insignes et par estoilles fixes,
Que de son change subit s'aproche l'aage,
Ne pour son bien, ne pour ses malefices.