1:27
Dessoubz de chaine Guien du ciel frappé,
Non loing de la est caché le tresor :
Qui par longs siecles auoit esté grappé,
Trouve mourra, l'œil crevé de ressort.

1:28
La tour de Boucq craindra fuste Barbare,
Un temps, long temps apres barque hesperique :
Bestail, gens, meubles, tous deux feront grand tare,
Taurus & Libra, quelle mortelle picque !

1:29
Quand le poisson terrestre & aquatique
Par forte vague au gravier sera mis,
Sa forme estrange sauve & horrifique,
Par mer aux mures bien tost les ennemis.

1:30
La nef estrange par le tourment marin,
Abourdera pres de port incogneu :
Nonobstant signes de rameau palmerin,
Apres mort pille bon avis tard Venu.

1:31
Tant d'ans les guerres en Gaule dureront,
Outre la course du Castulon monarque :
Victoire incerte trois grands couronneront,
Aigle, coq, lune, lyon, soleil en marque.

1:32
Le grand Empire sera tost translaté
En lieu petit, qui bientost viendra croistre,
Lieu bien infime d'exiguë comté
Où au milieu viendra poser son sceptre.

1:33
Pres d'un grand pont de plaine spatieuse,
Le grand lyon par forces Cesarées,
Fera abbatre hors cité rigoureuse,
Par effray portes luy seront reserées.

1:34
L'oyseau de proye volant a la semestre,
Avant conflict faict aux Francoys pareure,
L'un bon prendra, l'un ambigu sinistre,
La partie foyble tiendra par bon augure.

1:35
Le lyon jeune le vieux surmontera,
En champ bellique par singulier duelle,
Dans cage d'or les yeux luy crevera,
Deux classes une, puis mourir, mort cruelle.

1:36
Tard le monarque se viendra repentir,
De n'avoir mis à mort son adversaire,
Mais viendra bien à plus hault consentir,
Que tout son sang par mort fera defaire.